ਕੱਪੜੇ ਧੋਣ ਸੰਬੰਧੀ ਸੁਝਾਅ

ਕੱਪੜੇ ਧੋਣ ਵਾਲੀ ਮਸ਼ੀਨ ਵਿੱਚ ਇਸਤੇਮਾਲ ਹੋਣ ਵਾਲੀ ਊਰਜਾ ਦਾ ਲਗਭਗ 80% ਹਿੱਸਾ ਪਾਣੀ ਗਰਮ ਕਰਨ ਵਿੱਚ ਲੱਗਦਾ ਹੈ। ਕੱਪੜਿਆਂ ਨੂੰ ਠੰਡੇ ਪਾਣੀ ਵਿੱਚ ਧੋਣਾ ਮਸ਼ੀਨ ਦੀ ਊਰਜਾ ਦੀ ਵਰਤੋਂ ਨੂੰ ਘਟਾਉਣ ਦਾ ਸੌਖਾ ਤਰੀਕਾ ਹੈ। ਆਪਣੀ ਮਸ਼ੀਨ ਦਾ “ਕੋਲਡ ਵਾਸ਼” ਵਾਲਾ ਵਿਕਲਪ ਚੁਣੋ ਅਤੇ ਠੰਡੇ ਪਾਣੀ ਵਿੱਚ ਕੱਪੜੇ ਧੋਣ ਲਈ ਤਿਆਰ ਕੀਤੇ ਡਿਟਰਜੈਂਟ ਦੀ ਵਰਤੋਂ ਕਰਨੀ ਯਕੀਨੀ ਬਣਾਓ।

ਊਰਜਾ ਦੀ ਬਚਤ ਤੋਂ ਇਲਾਵਾ, ਠੰਡੇ ਪਾਣੀ ਵਿੱਚ ਕੱਪੜੇ ਧੋਣਾ ਕੱਪੜਿਆਂ ਲਈ ਵਧੀਆ ਹੁੰਦਾ ਹੈ ਅਤੇ ਇਸ ਨਾਲ ਤੁਹਾਡੇ ਕੱਪੜੇ ਵੀ ਜ਼ਿਆਦਾ ਦੇਰ ਤੱਕ ਚਲਦੇ ਹਨ।

ਕਿੰਨੀਆਂ ਬਚਤਾਂ? ਬੀ.ਸੀ. ਹਾਈਡ੍ਰੋ ਦੇ ਮੌਜੂਦਾ ਰੇਟਾਂ ਮੁਤਾਬਕ, ਅਤੇ ਹਫ਼ਤੇ ਵਿੱਚ ਲਾਂਡਰੀ ਦੇ ਤਿੰਨ ਲੋਡ ਕਰਨ ਦੇ ਆਧਾਰ ’ਤੇ, ਤੁਸੀਂ ਸਾਲਾਨਾ $22 ਦੀ ਬਚਤ ਕਰ ਸਕਦੇ ਹੋ।

ਨਿਪੁੰਨਤਾ ਨੂੰ ਵੱਧ ਤੋਂ ਵੱਧ ਰੱਖਣ ਲਈ, ਵਾਸ਼ਰ ਨੂੰ ਉਸ ਦੀ ਪੂਰੀ ਸਮਰੱਥਾ ਤੱਕ ਭਰੋ, ਜੋ ਕਿ ਲਗਭਗ ਤਿੰਨ-ਚੌਥਾਈ ਹਿੱਸੇ ਦੇ ਬਰਾਬਰ ਹੁੰਦੀ ਹੈ। ਮਸ਼ੀਨ ਵਿੱਚ ਘੱਟ ਕੱਪੜੇ ਪਾਉਣ ਨਾਲ ਊਰਜਾ ਦੀ ਬਰਬਾਦੀ ਹੋ ਸਕਦੀ ਹੈ। ਜੇ ਤੁਹਾਨੂੰ ਥੋੜ੍ਹੇ ਕੱਪੜੇ ਧੋਣ ਦੀ ਲੋੜ ਹੋਵੇ ਤਾਂ ਕੱਪੜੇ ਧੋਣ ਦੀ “ਲਾਈਟ” ਜਾਂ “ਐਕਸਪ੍ਰੈਸ” ਸੈਟਿੰਗ ਦੀ ਵਰਤੋਂ ਕਰੋ।

ਜੇ ਤੁਸੀਂ ਬਹੁਤ ਜ਼ਿਆਦਾ ਲਿੱਬੜੇ ਹੋਏ ਕੱਪੜੇ ਧੋਣੇ ਹਨ ਤਾਂ ਉਨ੍ਹਾਂ ਨੂੰ ਪਹਿਲਾਂ ਪਾਣੀ ਵਿੱਚ ਡੁਬੋ ਕੇ ਰੱਖੋ ਤਾਂ ਕਿ ਉਨ੍ਹਾਂ ਨੂੰ ਵਾਸ਼ਰ ਵਿੱਚ ਦੋ ਵਾਰੀ ਨਾ ਧੋਣਾ ਪਵੇ ਕਿਉਂਕਿ ਇਸ ਨਾਲ ਜ਼ਿਆਦਾ ਊਰਜਾ ਲੱਗਦੀ ਹੈ।

ਧਿਆਨ ਰੱਖੋ ਕਿ ਤੁਸੀਂ ਮਸ਼ੀਨ ਨੂੰ ਜ਼ਿਆਦਾ ਨਾ ਭਰੋ ਕਿਉਂਕਿ ਮਸ਼ੀਨ ਵਿੱਚ ਸਮਰੱਥਾ ਨਾਲ਼ੋਂ ਜ਼ਿਆਦਾ ਕੱਪੜੇ ਪਾ ਦੇਣ ਨਾਲ ਵਾਸ਼ਰ ਨੂੰ ਵਧੇਰੇ ਕੰਮ ਕਰਨਾ ਪਵੇਗਾ ਅਤੇ ਇਸ ਨਾਲ ਤੁਹਾਡੇ ਕੱਪੜਿਆਂ ਦੇ ਚੰਗੀ ਤਰ੍ਹਾਂ ਸਾਫ਼ ਹੋਣ ਵਿੱਚ ਵੀ ਰੁਕਾਵਟ ਖੜ੍ਹੀ ਹੋ ਸਕਦੀ ਹੈ।

ਮਸ਼ੀਨ ਦੇ ਵਾਸ਼ ਸਾਇਕਲ ਦੇ ਅੰਤ ’ਤੇ “ਹਾਈ-ਸਪੀਡ” ਜਾਂ “ਐਕਸਟੈਂਡਿਡ ਸਪਿੱਨ” ਦੇ ਵਿਕਲਪ ਤੁਹਾਡੇ ਧੋਤੇ ਹੋਏ ਕੱਪੜਿਆਂ ਵਿੱਚੋਂ ਨਮੀ ਘਟਾਉਣ ਵਿੱਚ ਸਹਾਈ ਹੁੰਦੇ ਹਨ ਜਿਸ ਨਾਲ ਕੱਪੜੇ ਸੁੱਕਣ ਦੇ ਸਮੇਂ ਨੂੰ ਘਟਾਉਣ ਵਿੱਚ ਮਦਦ ਮਿਲੇਗੀ।

• ਕੱਪੜਿਆਂ ਨੂੰ ਸੁਕਾਉਣ ਵਾਸਤੇ ਉਨ੍ਹਾਂ ਨੂੰ ਆਪਣੇ ਘਰ ਅੰਦਰਲੇ ਸਭ ਤੋਂ ਹਵਾਦਾਰ ਹਿੱਸੇ ਵਿੱਚ ਟੰਗੋ। ਬਸੰਤ ਰੁੱਤ ਜਾਂ ਗਰਮੀਆਂ ਦੇ ਮੌਸਮ ਵਿੱਚ, ਉਹ ਥਾਂ ਵਧੀਆ ਹੈ ਜੋ ਅਜਿਹੀ ਖਿੜਕੀ ਦੇ ਨੇੜੇ ਹੋਵੇ ਜਿਸ ਨੂੰ ਥੋੜ੍ਹਾ ਜਿਹਾ ਖੋਲ੍ਹਿਆ ਜਾ ਸਕੇ (ਆਦਰਸ਼ਕ ਤੌਰ ’ਤੇ ਜਿੱਥੇ ਧੁੱਪ ਵੀ ਆਉਂਦੀ ਹੋਵੇ)। ਪੱਤਝੜ ਰੁੱਤ ਅਤੇ ਸਰਦੀਆਂ ਦੇ ਮੌਸਮ ਵਿੱਚ, ਉਹ ਥਾਂ ਵਧੀਆ ਹੈ ਜਿੱਥੇ ਵੈਂਟੀਲੇਸ਼ਨ ਫੈਨ ਲੱਗਿਆ ਹੋਵੇ, ਜਿਸ ਦੀ ਕਿ ਸਭ ਤੋਂ ਵੱਧ ਸੰਭਾਵਨਾ ਬਾਥਰੂਮ ਵਿੱਚ ਹੁੰਦੀ ਹੈ।
• ਗਿੱਲੇ ਕੱਪੜੇ ਬੰਦ ਕਮਰੇ ਅੰਦਰ ਸੁੱਕਣੇ ਨਾ ਪਾਓ, ਜਿਵੇਂ ਕਿ ਬੈੱਡਰੂਮ, ਜਾਂ ਹਵਾਦਾਰੀ ਤੋਂ ਬਗ਼ੈਰ ਥਾਵਾਂ, ਜਿਵੇਂ ਕਿ ਅਲਮਾਰੀਆਂ।
• ਆਪਣੇ ਕੱਪੜੇ ਸਵੇਰੇ-ਸਵੇਰੇ ਧੋਵੋ ਤਾਂ ਕਿ ਕੱਪੜੇ ਦਿਨ ਵੇਲੇ ਸੁੱਕ ਸਕਣ ਜਦੋਂ ਕਿ ਜ਼ਿਆਦਾਤਰ ਘਰ ਨਿੱਘੇ ਹੁੰਦੇ ਹਨ।
• ਵੱਡੀਆਂ ਜਾਂ ਭਾਰੀਆਂ ਵਸਤਾਂ ਜਿਵੇਂ ਕਿ ਚਾਦਰਾਂ ਅਤੇ ਰਜਾਈਆਂ ਦੇ ਕਵਰ ਅੰਦਰ ਸੁੱਕਣੇ ਪਾਉਣ ਲਈ ਕਾਫੀ ਵੱਡੇ ਹੁੰਦੇ ਹਨ। ਇਨ੍ਹਾਂ ਨੂੰ ਬਾਹਰ ਸੁੱਕਣੇ ਪਾਉਣਾ ਜਾਂ ਡ੍ਰਾਇਰ ਵਿੱਚ ਸੁਕਾਉਣਾ ਬਿਹਤਰ ਰਹਿੰਦਾ ਹੈ।
• ਕੱਪੜਿਆਂ ਦੇ ਵਿਚਕਾਰ ਹਵਾ ਦਾ ਵਹਾਅ ਬਰਕਰਾਰ ਰੱਖਣ ਲਈ ਸੁੱਕਣੇ ਪਾਉਣ ਸਮੇਂ ਉਨ੍ਹਾਂ ਵਿਚਕਾਰ ਕਾਫ਼ੀ ਜਗ੍ਹਾ ਛੱਡ ਦਿਓ ਅਤੇ ਅਜਿਹਾ ਕਰਨਾ ਕੱਪੜਿਆਂ ਦੇ ਜਲਦੀ ਸੁੱਕਣ ਵਿੱਚ ਸਹਾਈ ਹੋਵੇਗਾ।
• ਧੋਤੇ ਹੋਏ ਕੱਪੜਿਆਂ ਨੂੰ ਸੁਕਾਉਣ ਲਈ ਉਨ੍ਹਾਂ ਨੂੰ ਆਪਣੇ ਹੀਟਰ ਜਾਂ ਰੇਡੀਏਟਰ ਦੇ ਉੱਪਰ ਨਾ ਟੰਗੋ। ਇਸ ਨਾਲ ਨਮੀ ਵਾਲੀ ਹਵਾ ਪੈਦਾ ਹੁੰਦੀ ਹੈ ਜੋ ਤੁਹਾਡੀਆਂ ਕੰਧਾਂ ’ਤੇ ਜਮ੍ਹਾਂ ਹੋ ਜਾਵੇਗੀ।
• ਕੱਪੜਿਆਂ ਨੂੰ ਕੋਟ ਵਾਲੇ ਹੈਂਗਰਾਂ ਉੱਪਰ ਟੰਗੋ। ਇਸ ਨਾਲ ਕੱਪੜਿਆਂ ਦੇ ਦੋਹਾਂ ਪਾਸੇ ਹਵਾ ਲੱਗਣ ਵਿੱਚ ਮਦਦ ਮਿਲਦੀ ਹੈ, ਵੱਟ ਪੈਣ ਤੋਂ ਰੋਕਥਾਮ ਹੁੰਦੀ ਹੈ ਅਤੇ ਸੁੱਕੇ ਹੋਏ ਕੱਪੜਿਆਂ ਨੂੰ ਅਲਾਮਰੀ ਵਿੱਚ ਟੰਗਣਾ ਬਹੁਤ ਸੌਖਾ ਹੋ ਜਾਂਦਾ ਹੈ।